Woso snack ik Platt? Dat is mien Mudderspraak un heel van alleen kamen. Dor sünd wi jo all mit upwussen. In Sandst (Sandstedt), nich wiet weg van Bremerhaven, bün ik up de Welt kamen. As Kinner hebbt wi blots Platt snackt... bit wi na School mussen. Dor gung dat los mit de erste Fremdspraak Hochdüütsch. As ik later in de Lehr keem, hebbt wi veel up’n Lannen to doon harrt, dor snackten wi meisttiets ok Platt.
Laterhen bin ik denn Schandarm worrn un heff rund teihn Johr in Hannover Deenst maakt. Dor dreep sik dat goot, dat ik up us Wache mit noch dree Kollegen ut Ostfreesland, Wittmund un Varel tohoop keem. Wenn wi denn mit’nanner snackt hebbt, hebbt de Hochdüütschen dat Feld rüümt: “Geht Ihr man in Euer Ostfriesenbüro!“
Later keem ik denn na Braak (Brake/Unterweser) un weer denn jo dicht bi mien Öllernhuus. Över de Werser gung dat mit de Fähr jo heel fix. Un Sandst hett ok een Theatergrupp, de „Kolkspeeler“. Dor harr ik fröher as jungen Keerl mal speelt, un dor heff ik denn wedder regelmäßig mitmaakt. Ik heff denn veel Bökers leest un ok Stücken utsöcht.
Denn wurr 1998 dat Freelichtspill in Braak mit „Brommy ……“ van de Nedderdüütsche Bühn Braak speelt. Dor weer ik denn dat erste Maal in Braak aktiv. Van de Tiet an weer ik noch in mehrere Stücken, af un an ok in Wiehnachtsmärken, dorbi.
As ik denn wegen de Gesundheit (or Krankheit) nich mehr up de Bühn kunn, heff ik, so goot as dat gung, bi den Kulissenboo hulpen. Blangenbi heff ik Textbökers leest un bün bi dat Studeren up Stücken kamen, de dat in Platt noch nich geev.
Van de Tiet an heff ik Theaterstücke in de Plattdüütsche Spraak översett't. Wiel ik een Minsch mit veel Humor bün, heff ik mi to'n Översetten Komödien utsöcht. Un de ward nu in ganz Noorddüütschland van Oost bit West speelt.
Van de lüttste Laienspeelschar över meist all Amateurtheater ut den Bühnenbund Neddersassen/ Bremen, Hamborg, Sleswig-Holsteen un Mecklenborg-Vorpommern; dorto ut de Eck van Westfalen. In Hamborg hett dat Ohnsorg-Theater ok dat Stück „Keerls dör un dör“ (Hochdüütsch: Ganze Kerle) in't Programm nahmen un bannig Erfolg harrt. Dat NDR-Fernsehen hett düt Stück denn upnahmen un sogar al up NDR FS utstrahlt.
Un wat seggt al Olli Kahn: Weiter, immer weiter! Also: Wietermaken... jümmers wieter! Also denn: Ik wünsch Jo jümmers veel Spaaß!
Heino Buerhoop
